ករណីគ្រោះថ្នាក់ចរាចរណ៍ប្រធានការិយាល័យ អប់រំស្រុកបរកែវ គាបស្លាប់ក្នុងរថយន្ត
27-March-2016 | ដោយ មែន កំសត់
រតនៈគីរី ៖ គ្រោះថ្នាក់ចរាចរណ៍រវាងរថយន្តធុនធំដឹក ដំឡូងបុកជាមួយរថយន្តម៉ាកហាយឡិនឌ័រ ស្ថិតក្នុងភូមិឡាប៉ូ សង្កាត់យក្សឡោម ក្រុងបានលុង កាលពីយប់ថ្ងៃទី២៥ ខែមីនា ឆ្នាំ២០១៦ ដែលមានបុរសរងគ្រោះម្នាក់គាបស្លាប់ ក្នុងរថយន្តនោះ សមត្ថកិច្ចបានបញ្ជាក់ថា ជាប្រធានការិយាល័យអប់រំស្រុកបរកែវ ខេត្តរតនគីរី។
នៅព្រឹក ថ្ងៃទី២៦ខែមីនាឆ្នាំ២០១៦នេះ លោក ឈិន ថេន អនុប្រធានការិយាល័យនគរបាលចរាចរណ៍ខេត្តរតនៈគិរី បានឲ្យដឹងថា បុរសដែលគាបស្លាប់ក្នុងរថយន្តហាយលែនឌ័រពាក់ស្លាកលេខភ្នំពេញ 2T 7559 ខណៈជួបគ្រោះថ្នាក់ចរាចរនោះ គឺជាប្រធានការិយាល័យអប់រំស្រុកបរកែវឈ្មោះ មៀច ឈិន អាយុ៤៦ឆ្នាំ នៅភូមិ១ឃុំឡាមិញ ស្រុកបរកែវ។ ចំណែកអ្នកបើករថយន្តយីឌុបដឹកដំឡូងមានឈ្មោះ មាស ម៉ម អាយុ៤៣ឆ្នាំ មានទីលំនៅភូមិជ្រៃស្រុកស្វាយអន្ទរ ខេត្តព្រៃវែង បានរត់ គេចខ្លួនបាត់។
សាក្សីបានបញ្ជាក់ប្រាប់សមត្ថកិច្ចថា មុនកើតហេតុពួកគាត់បានឃើញរថយន្តយីឌុបដឹកដំឡូងពេញបើកបរលើផ្លូវ ជាតិលេខ៧៨ ពីកើតទៅលិចស្របពេលដែលរថយន្តហាលែនឌ័រ បើកពីលិចទៅកើតដំណើរបញ្ច្រាស់គ្នា។ លុះមកដល់ត្រង់ភូមិឡាប៉ូ សង្កាត់យក្សឡោម ក្រុងបានលុង ក៏បុកគ្នាពេញទំហឹងបណ្តាលឲ្យបុរសម្នាក់គាបស្លាប់ក្នុងរថយន្ត តែម្តង។
ក្រោយពីគ្រោះថ្នាក់កើតឡើងសមត្ថកិច្ចបានចុះធ្វើការត្រួតពិនិត្យរួច ប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី។ ចំណែកឯរថយន្តគ្រោះថ្នាក់ទាំងពីរគ្រឿង ត្រូវបានកម្លាំងនគរបាលចរាចរណ៍អូសយកទៅរក្សាទុកនៅស្នងការដ្ឋាន នគរបាលខេត្តរតនគិរី ដើម្បី ដោះស្រាយតាមផ្លូវច្បាប់៕
ចំនួនអ្នកទស្សនា
- ថ្ងៃនេះ10671
- ម្សិលមិញ15681
- សប្តាហ៍នេះ69511
- ខែនេះ91391
- ឆ្នាំនេះ91391
- សរុប20533847